Wara s-suċċess tal-proġett pilota, il-Proġett msemmi ‘Aġenda Ewropea għat-Tagħlim tal-Adulti’ permezz tal-programm ‘Schools as Community Learning Spaces’ qed iniedi t-tieni kamra għat-tagħlim tal-adulti. Din id-darba fl-Induction Hub tan-Naxxar, skola li fiha tilqa’ studenti barranin biss, b’ġenituri li fil-biċċa l-kbira jaħdmu sigħat twal mit-Tnejn sal-Ħadd, u wħud minnhom la jitkellmu Malti u lanqas Ingliż.

Permezz tal-lezzjonijiet li bdew jingħataw għall-ewwel darba s-sena skolastika li għaddiet fil-Malti u l-Ingliż, nibtu ħbiberiji ġodda u nħolqot komunità magħquda fejn il-ġenituri jgħinu lil xulxin u jagħmlu l-volontarjat fl-istess skola. Jonathan Portanier Mifsud, il-Kap ta’ din l-Iskola sostna li minkejja li l-ġenituri huma impenjati ħafna xorta huma dedikati għal uliedhom u jagħtu ħinhom għall-iskola kif ukoll għall-proġett innifsu. Fil-fatt ħamsa minnhom bajdu l-klassi minn jeddhom fil-ħin liberu tagħhom. Il-proġett f’din l-iskola tant kien suċċess li għal-lezzjonijiet li jmiss għandhom 70 ruħ interessati li jattendu għal-lezzjonijiet. Fil-bidu kien ikollhom medja ta’ 15-il ruħ attendenza.

Patrick Decelis, il-Prinċipal tal-Kulleġġ Maria Reġina, faħħar is-sinerġiji u l-għaqda li kien hemm biex seħħ dan il-proġett u spjega li din se tkun “kamra użata għall-komunità. Biha npoġġu fil-prattika dak li nemmnu fih.”

Stephen Cachia, id-Direttur Ġenerali fid-Dipartiment għall-Kurrikulu, Tagħlim fit-Tul u Impjegabbiltà żied : “Din il-kamra se tkun oppportunità biex tgħin lill-ġenituri ta’ studenti li għandhom l-iktar bżonn.” Opportunità  li tagħti t-tieni ċans lil dawk l-adulti li ġarrbu esperjenza qarsa meta kienu żgħar fl-iskola biex ikomplu jitgħallmu f’ambjent maħsub apposta għalihom. Dan iwassal biex uliedhom iħossuhom iktar komdi jattendu l-iskola u jservu ta’ mudell għalihom li m’hemm xejn ħażin li tkompli titgħallem wara li tispiċċa mill-iskola.

“Dawn il-kmamar huma postijiet ta’ tagħlim fil-komunità u għalhekk qegħdin isiru fl-iskejjel tal-primarja. Nidentifikaw kamra fl-iskola u nittrasformawha għall-bżonnijiet tal-komunità, mhux għat-tagħlim biss imma anki biex tintuża għal-laqgħat differenti, kemm waqt ħin l-iskola u anka wara,” qalet Christianne Fenech, il-Maniġer tal-Proġett fid-Direttorat għar-Riċerka, Tagħlim fit-Tul u Impjegabbiltà. Alex Farrugia, id-Direttur għar-Riċerka, Tagħlim fit-Tul u Impjegabbiltà, semma’ kif minn proġett pilota fl-iskola tal-Belt id-Direttorat qed jimraħ biex ikollu firxa nazzjonali. Fil-fatt laħaq il-komunitajiet tal-Baħrija, il-Ħamrun u l-Isla minbarra n-Naxxar u l-Belt u hemm l-intenzjoni li jkompli li jinfirex f’iktar skejjel f’Malta u Għawdex.