Alan Morgan, Storja tal-Komunità mill-Irlanda
Jiena Speċjalista Intraprenditorjali u faċilitatur fl-Akkademja tal-Innovazzjoni tal-UCD (il-link hija esterna). Jien għandi entużjażmu kbir għall-edukazzjoni u ħerqan li naħdem fuq l-iżvilupp ta’ mod ġdid ta’ tagħlim permezz tal-kunċett ta’ Metodi Pedagoġiċi Intraprenditorjali.
Jiena bħalissa naħdem bħala Direttur tal-Programmi fl-Akkademja tal-Innovazzjoni għaċ-Ċertifikati/Diplomi Professjonali għall-Kreattività u l-Innovazzjoni fl-Edukazzjoni. Nemmen li kulħadd jeħtieġ ikollu mentalità intraprenditorjali biex jegħleb l-isfidi u biex jikkapitalizza fuq l-opportunitajiet biex jirnexxi fix-xogħol u l-ħajja fis-Seklu 21. Mentalità intraprenditorjali hija waħda li tgħaqqad il-kapaċità li tidentifika u toħloq ideat ta’ valur (soċjali, kulturali jew ekonomiċi) mal-kapaċità li titgħallem permezz ta’ iterazzjoni intenzjonata (tagħlim minn żbalji), flimkien mal-kapaċità li tinvolvi lill-oħrajn permezz tal-empatija, ix-xogħol f’tim u ħiliet effettivi ta’ komunikazzjoni.
Ilni naħdem fid-dinja akkademika mill-2012, u tajt lectures f’għadd ta’ kulleġġi tan-negozju Irlandiżi inkluż l-Iskola tan-Negozju ta’ Dublin fejn ħdimt bħala Direttur tal-Kors dwar il-Kummerċjaliazzjoni għal 3 snin. Qabel ma dħalt fid-dinja akkademika, akkumulajt aktar minn 20 sena ta’ esperjenza intraprenditorjali u intraprendenti mifruxa mal-industrija kollha li tkopri l-bejgħ bl-imnut, is-servizzi u d-distribuzzjoni, fejn kelli rwoli fil-maniġment superjuri bħala Maniger Anzjan fil-katina tal-provvista u fit-tmexxija. Għandi MBA mill-Università John Moores f’Liverpool u bħalissa qed nistudja għal Dottorat fl-Edukazzjoni fl-Università Trinity Saint David f’Wales.
Smajt dwar l-EPALE mingħand kollega, iżda aċċessajt il-pjattaforma reċentement biss fit-30 ta’ April 2020. Jista’ jkun kmieni wisq għal risposta, iżda nħoss li l-EPALE tista’ tkun siewja ħafna.
Din is-sitwazzjoni ta’ emerġenza, riżultat tal-pandemija tal-Covid19, bidlitli ta’ taħt fuq il-ħajja ta’ kuljum tiegħi.
Issa qed naħdem mid-dar fuq l-iżvilupp u t-twassil tal-programmi tiegħi li qabel kienu jingħataw fil-klassi, eżempju klassiku ta’ adattament intraprenditorjali..!
Waqt il-kriżi, qed inkompli nitgħallem affarijiet ġodda, bħal pereżempju kif għandek tuża teknoloġija ġdida u kif tidra mod ġdid ta’ tagħlim, permezz ta’ diversi pjattaformi differenti ta’ vidjokonferenzi.
Sal-lum implimentajt ħafna soluzzjonijiet ġodda u innovattivi. Sibt modi ġodda ta’ kif ninteraġixxi mal-istudenti tiegħi fid-dinja virtwali. Id-differenza bejn it-tagħlim mill-bogħod u l-lezzjonijiet fil-klassi hija sinifikanti. L-ambjent ta’ tagħlim mill-bogħod jitlob ħafna aktar ippjanar u tħejjija minn naħa tal-għalliem.
L-esperjenza tiegħi tat-tagħlim elettroniku, it-tagħlim onlajn u l-mobilità virtwali kienet pożittiva, għalkemm kelli wkoll niffaċċja proċess iebes ta’ tagħlim.
M’għandi l-ebda dubju li din l-esperjenza se tibdel il-forniment tat-tagħlim lill-adulti fil-futur.
Mill-esperjenza tiegħi, l-istudenti tiegħi qed jirrispondu u jadattaw straordinarjament tajjeb għall-bidliet, hekk kif ilkoll flimkien qed naħdmu pass pass biex nadattaw għal din is-sitwazzjoni!
EPALE Malta