Fil-11 ta’ Ottubru 2017 bdiet l-14-il edizzjoni ta’ Darba waħda... f’Bormla, Malta, li fiha qed tlaqqa’ parteċipanti mill-Kalkara, il-Birgu, Bormla u l-Isla. Dan il-proġett jagħmel parti mill-programm kulturali ta’ Valletta 2018 u għandu t-tmexxija ta’ Anna Formosa, li hi prattikanta ta’ applied drama. L-għan ewlieni tiegħu hu li jġib flimkien anzjani ma’ tfal biex jaqsmu l-memorji tagħhom, jirrakkuntaw l-istejjer, jipparteċipaw fi drama, jilagħbu, joħolqu affarijiet ġodda kif ukoll igawdu mill-kumpanija ta’ xulxin waqt li jitgħallmu minn xulxin f’ambjent kreattiv.

Darba waħda... toffri taħlita ta’ elementi. Tipprovdi opportunità lit-tfal biex jiżviluppaw interazzjonijiet b’saħħithom kif ukoll irawmu r-rispett lejn l-anzjani.  Toffri wkoll l-ispazju biex jitħalla legat billi jingħaddew stejjer u tradizzjonijiet liż-żgħar waqt li l-anzjani jingħatalhom il-valur mistħoqq fil-komunità tagħhom.  

Dan il-proġett beda fl-2015. Kull edizzjoni tikkonsisti f’sett ta’ għaxar workshops ta’ 90 minuta u kull darba ssir f’lokalità differenti f’Malta u Għawdex biex b’hekk jingħata ċans lil nies minn madwar il-gżira jieħdu sehem. Matul is-sessjonijiet il-parteċipanti jitgħallmu minn xulxin, jużaw il-kreattività tagħhom, jiżviluppaw lilhom infushom u jiksbu ħiliet ġodda waqt li jkunu qegħdin jieħdu gost f’ambjent kreattiv u sigur. Il-proġett ifittex li jippromwovi sens ta’ komunità, kuntentizza u anzjanità attiva li jindirizzaw solitudni u d-differenza bejn il-ġenerazzjonijiet.

Żur ukoll dan l-artiklu  li jispjega iktar fid-dettall dwar kif dawn is-sessjonijiet iservu ta’ għodda ta’ tagħlim informali għall-parteċipanti kollha. Għal aktar tagħrif żur il-paġna ta’ Facebook ta’ Darba waħda... jew ibgħat email fuq  darbawahda@valletta2018.org