Id- Direttorat għar-Riċerka, Tagħlim Tul il-Ħajja u Impjegabilita’ fi ħdan il-Ministeru tal-Edukazzjoni u x-Xogħol bħalissa qed jikkoordina l-proġett tal-Aġenda Ewropea għat-Tagħlim għall-Adulti, li jkopri tagħlim fil-komunità u l-promozzjoni għat-tagħlim għall-adulti f’Malta. Daniela Blagojevic Vella, Assistent Direttur tad-Direttorat għat-Tagħlim tul il-Ħajja, tispjega aħjar ix-xogħol li qed isir fi ħdan id-Direttorat biex it-tagħlim għall-adulti jkompli jsir aktar aċċessibbli għal kulħadd.

Il-Kummissjoni Ewropea tagħraf il-ħtieġa li l-adulti kollha jtejbu l-ħiliet u l-kompetenzi personali u professjonali tagħhom imma konxja li l-parteċipazzjoni tal-adulti fit-tagħlim għadha waħda baxxa. Ix-xogħol tal-Aġenda Ewropea għat-Tagħlim għall-Adulti f’Malta hu li taħdem b’mod dirett mal-Kummissjoni Ewropea u tara kif se ttejjeb din is-sitwazzjoni f’Malta.

“L-idea tal-Kummissjoni hi li t-tagħlim tal-adulti jkun prijorità fil-pajjiżi kollha, b’mod speċjali meta qed nitkellmu li nilħqu nies bejn l-etajiet ta’ 25 u 64 sena, speċjalment dawk li huma l-iktar vulnerabbli jew m’għandhomx ħiliet bażiċi. L-UE tagħtina fondi biex nilħquhom aħjar u anki ntejbu l-politka, ir-riċerka u fl-aħħar mill-aħħar l-implimentazzjoni ta’ dak li għandu x’jaqsam ma’ tagħlim tul il-ħajja,” spjegat Daniela Blagojevic Vella, l-Assistent Direttur tad-Direttorat għat-Tagħlim tul il-Ħajja kif ukoll il-Koordinatur Nazzjonali għall-Aġenda f’Malta.

Titkellem dwar x’qed isir f’Malta.

“Fl-2014 Malta ppubblikat il-politka għat-Tagħlim Tul il-Ħajja 2020. Fuq livell nazzjonali, il-prijoritajiet qegħdin hemm. Biss bl-Aġenda Ewropea hemm iżjed valur. Xogħolna hu li naraw jekk il-prattiċi humiex jaħdmu u x’qed isir barra minn Malta. Il-parteċipazzjoni bħala koordinatur nazzjonali tgħinna naraw l-affarijiet b’mod sħiħ kif ukoll ikun hemm skambju dirett waqt li naħdmu hands-on ma’ pajjiżi oħra,” żiedet tgħid is-Sa Blagojevic Vella.

Kompliet tgħid: “Malta ħadmet ħafna mal-Irlanda. Fil-fatt ħa nniedu proġett ġdid fl-aħħar ta’ Frar li jiffoka fuq kif l-adult ikun jista’ jagħraf x’ħiliet għandu hu nnifsu, u anka jkun jista’ jifhem aħjar x’inhi l-offerta ta’ tagħlim li hemm kif ukoll itejjeb il-ħiliet tiegħu. Hu proġett mal-Irlanda u n-Norveġja bl-isem ‘Check-in Take-off’.”

L-istess proġett qed jagħti wkoll prijorità lir-rwol tal-edukatur. Fis-settur qed issir ħidma biex ikun hemm iktar professjonalizzazzjoni. Min qed jgħallem ukoll irid jingħata l-ħiliet meħtieġa biex jilħaq lill-adult b’mod effettiv. Bil-fondi tal-UE, id-Direttorat seta’ jinvesti fl-edukaturi tiegħu u jħejji programmi apposta biex l-għalliema jispeċjalizzaaw fit-tagħlim tal-adulti. Dax-xogħol se jkompli permezz tal-Università. Fil-fatt twaqqaf dipartiment speċjalizzat f’dal-qasam: Department of Arts, Open Communities and Adult Education.

“L-aspett l-ieħor hu li ntejbu d-diversità ta’ korsijiet offruti lill-adulti u li dak li noffru jkun ta’ kwalità, flessibbli u addattat għall-bżonnijiet tagħhom. Qed inkunu iktar iffukati fuq dak li għandhom bżonn nies differenti. Ir-realtà hi li hemm ħafna nies li jaħdmu u/jew huma ġenituri. Allura għandhom ħin limitat ħafna għat-tagħlim. Irridu naraw li dak li noffru u kif noffruh hu komdu u addattat. Diffiċli tmur għall-kors u tibqa’ ssegwih għax l-ikbar diffikultà hi l-ħin. Għalhekk it-tagħlim irid ikun flessibbli u l-korsijiet qegħdin isiru fil-komunità bħall-kunsilli lokali u ċentri differenti,” qalet l-Assistent Direttur.

Parti mix-xogħol tal-Aġenda Ewropea hu li tagħmel reviżjoni tal-korsijiet sabiex ittejjibhom kif ukoll tara xi prattiċi qegħdin isiru lil hinn minn Malta.

“Qegħdin naħsbu f’aspetti oħra fosthom ħinijiet differenti u anke hux possibbli li ċerti korsijiet jibdew jingħataw online. L-aspett l-ieħor li qegħdin naħdmu fuqu hu kif se nilħqu lin-nies.

“Irridu ninsistu u ndaħħlu l-idea li m’għandekx għalfejn tistħi li tkompli titgħallem. Fadal ħafna xi jsir u trid tibda tidħol iktar il-kultura ta’ tagħlim tul il-ħajja flok dik li taqdik għal ftit – li titgħallem għax għandek bżonn daċ-ċertifikat jew dak il-kors. Id-dinja qed tinbidel u t-tagħlim sar għandu rwol iktar importanti għall-benesseri tal-bniedem.”