Одржан ВЕБИНАР: Образование за родители, или како да се биде родител од новото време
Во рамките на ЕПАЛЕ академијата, ЕПАЛЕ Нaционалниот сервис за поддршка организираше вебинар на тема: „Образование за родители, или како да се биде родител од новото време“. Целта на овој настан беше да го одбележиме 15-ти мај - Меѓународниот ден на семејството и да придонесеме кон подигнување на свесноста на родителите и старателите за образованието и воспитувањето на децата и нивната благосостојба, но и да го назначи значењето за воспоставување на баланс помеѓу работата на родителите и нивната семејна улога. Кои се предизвиците кои ги носи родителството во современото живеење? Имаат ли родителите потреба од дополнителна поддршка? Што се прави на оваа тема кај нас и дали постојат меѓународни искуства од кои можеме да научиме?
Во рамките на настанот, имавме чест да слушнеме излагања на неколку говорници, кои со своето огромно искуство, и од наука и од пракса, навистина го привлегоа вниманието на слушателите.
М-р Гоце Бумбароски, одделенски наставник во ООУ Кочо Рацин – Прилеп зборуваше на темата „За сѐ што им замерувате на децата, тие тоа го виделе токму кај вас!“. Ред. проф. д-р Деан Илиев од УКЛО се обрати на темата "Дидактика за родители-нова перспектива на воспитно-образовниот процес, а професорката Татјана Зорчец, психолог, од Македонска асоцијација за применета психологија СИМБОЛИКУМ Скопје, го презентираше Еразмус+ проектот: „Синергeтско образование на родители со деца со посебни потреби“, во кој слушнавме за предизвиците на родителите, но и како образованието на родители може да се унапредува на меѓународно ниво.
На крајот, ЕПАЛЕ координаторката, Љупка Ќуркчиева, накратко ја презентираше ЕПАЛЕ платформата и функционалностите кои овозможуваат пристап до ресурси релевантни за образованието за возрасни.
Дискусиите и прашањата од учесниците открија интерес и потреба за подобрување на родителските вештини и знаења.
Се надеваме дека овој мал настан ќе биде поттик за поголем интерес на јавноста за оваа тема во наредниот период.
ЕПАЛЕ Национален Сервис за поддршка