Vendet e Ballkanit Perëndimor karakterizohen nga një popullsi në rënie, e nxitur nga niveli i ulët i lindjeve, plakja e popullsisë dhe migrimi i vazhdueshëm. Emigrimi nga rajoni ka qenë konstant që nga vitet 1990, duke evoluar nga migracioni i parregullt për qëllime pune mes personave me nivele të ulëta kualifikimi deri në nivele mesatare aftësish për punë në migrim të rregullt për qëllime të ribashkimit familjar, studentë që studiojnë jashtë dhe, së fundmi, migrim për qëllime pune të personave me një nivel të lartë aftësish. Në vitin 2020, Fondacioni Evropian i Trajnimit (ETF), së bashku me Institutin e Vjenës për Studime Ekonomike Ndërkombëtare (wiiw), filluan një studim rajonal të titulluar 'Dinamikat e migrimit nga perspektiva e kapitalit njerëzor në Ballkanin Perëndimor'. Qëllimi i tij ishte të hidhte dritë mbi marrëdhëniet trekëndëshe midis formimit të kapitalit njerëzor, tregjeve të punës dhe migrimit, dhe të përcaktonte se si funksionon aktualisht sistemi arsimor dhe si ndikon tregu i punës te migrimi në secilin vend. Studimi ka përfshirë një analizë të gjerë të literaturës dhe raporteve ekzistuese dhe zhvillimin e mjeteve për të analizuar rrjedhën dhe të dhënat e disponueshme për migrantët shqiptarë bazuar në statistikat ndërkombëtare ekzistuese. Një analizë e veçantë statistikore e bazuar në të dhënat e Anketës së Fuqisë Punëtore Shqiptare (2011– 2019) është kryer duke përdorur qasjen e kohortit.