chevron-down chevron-left chevron-right chevron-up home circle comment double-caret-left double-caret-right like like2 twitter epale-arrow-up text-bubble cloud stop caret-down caret-up caret-left caret-right file-text

EPALE

Pjattaforma Elettronika għat-Tagħlim għall-Adulti fl-Ewropa

 
 

Blog

Proġett kreattiv li jlaqqa’ anzjani ma’ tfal – għodda ta’ tagħlim informali għal ġenerazzjonijiet differenti

06/11/2017
minn Mahira Spiteri
Lingwa: MT
Document available also in: EN

/mt/file/img0893jpgimg_0893.jpg

Il-proġett kreattiv Darba waħda..., li jlaqqa’ anzjani ma’ tfal, ilu għaddej f’Malta mill-2015 grazzi għall-inizjattiva ta’ Anna Formosa, li hi prattikanta ta’ applied drama. Darba waħda... jagħmel parti mill-programm kulturali ta’ Valletta 2018. Sal-2018 ’il fuq minn 200 ruħ minn madwar 50 lokalità f’Malta u Għawdex se jkunu gawdew minnu. Sas-sena d-dieħla l-proġett se jkun sar 18-il darba u hu maħsub li jiġi estiż biex jilħaq persuni oħra fosthom dawk li jgħixu fi djar tal-anzjani.

 

Il-proġett għandu l-għan li jġib flimkien anzjani, li huma indipendenti u għadhom attivi fil-komunità, ma’ tfal bejn id-9 snin u t-12-il sena f’ambjent kreattiv. Hemmhekk huma jagħmlu attivitajiet bħal drama, rakkuntar ta’ stejjer, logħob u eżerċizzji, mużika, arti u krafts. L-isem ‘Darba waħda...’ ingħatalu għax jirrappreżenta l-bidu ta’ storja li tiżvolġi matul il-ħidma fil-workshops.

 

 

Dawn il-workshops, minbarra li jindirizzaw kwistjonijiet bħal solitudni u d-differenza bejn il-ġenerazzjonijiet, iservu wkoll bħala għodda ta’ tagħlim informali għaż-żewġ ġenerazzjonijiet.

“Hu pożittiv ħafna li tisma’ lill-parteċipanti, l-aktar dawk kbar, jgħidu li sessjoni ta’ arti u krafts ispirathom jerġgħu jibdew jipprattikaw delizzju li għal xi raġuni kienu waqfu, jew li l-proġetti tal-arti li nkunu għamilna jħajruhom imorru d-dar u joħolqu affarijiet oħra jew jiddeċiedu li jibdew jattendu korsijiet apposta,” spjegat is-Sa Formosa.

 

Il-parteċipanti anzjani jattendu dawn il-workshops għax huma pjaċevoli u jieħdu gost jaqsmu l-istejjer u l-esperjenzi tagħhom ma’ sħabhom – kbar u żgħar, waqt li jinsew il-problemi tal-ħajja. Numru kbir ta’ parteċipanti semmew ukoll li jieħdu gost mill-proċess ta’ tagħlim li joffru dawn is-sessjonijiet. Parteċipanta adulta semmiet li tgħallmet taħdem aktar fi grupp. Oħra, li għandha ’l fuq minn 70 sena, qalet: “Inkompli nattendi għax ħadt gost, interessanti u titgħallem affarijiet ġodda li waħdek forsi ma titgħallimx.”

       

Fil-każ tat-tfal huma jieħdu gost għax il-workshops huma divertenti u jagħtuhom ċans ikunu kreattivi. Barra minn hekk igawdu mil-legat li jingħaddilhom minn sħabhom l-anzjani, xi ħaġa li hi essenzjali għal Darba waħda... It-tfal jitgħallmu b’mod informali dwar l-istorja popolari u ħrejjef tradizzjonali kif ukoll jiksbu ċerti ħiliet bażiċi u personali. Isiru iktar kunfidenti kif ukoll jitgħallmu jikkomunikaw aħjar u jaħdmu fi grupp.

“Uħud mit-tfal jidħlu mistħija bilkemm jaqilgħu għajnejhom mill-art. Imma ġimgħa wara ġimgħa jibdew joħorġu minn qoxrithom. Hawnhekk jiġu f’ambjent sigur u l-inkoraġġiment u l-attenzjoni li jingħataw mill-anzjani jgħinuhom jiksbu l-kunfidenza,” spjegat il-koordinatriċi tal-proġett. 

 

/mt/file/rszimg8405jpgrsz_img_8405.jpg

Darba waħda... jinkoraġixxi wkoll empatija u li l-parteċipanti, l-iktar it-tfal, jieħdu ħsieb tal-oħrajn. Is-Sa Formosa tħoss li hu pożittiv ħafna li t-tfal jibdew iqisu lill-parteċipanti anzjani bħala ħbieb tagħhom u jinkluduhom fil-logħob bla ma jagħtu kas ta’ kemm huma kbar fl-età jew li mhumiex żvelti daqshom.

“Togħġobni d-dinamika li tinħoloq bejn il-parteċipanti kollha. Sabiħ wisq li tara l-kbar u ż-żgħar juru rispett lejn xulxin u juru l-istess entużjażmu għal logħba jew eżerċizzju. Hu ta’ sodisfazzjon kbir li tara kemm dan il-proġett jaffettwa lil kulħadd b’mod pożittiv,” temmet tgħid Anna Formosa.  

/mt/file/img197725707703994ojpgimg_1977_25707703994_o.jpg

Share on Facebook Share on Twitter Epale SoundCloud Share on LinkedIn