chevron-down chevron-left chevron-right chevron-up home circle comment double-caret-left double-caret-right like like2 twitter epale-arrow-up text-bubble cloud stop caret-down caret-up caret-left caret-right file-text

EPALE

Pjattaforma Elettronika għat-Tagħlim għall-Adulti fl-Ewropa

 
 

Blog

Skambju ta’ Għarfien u Tagħlim f’Malta

01/08/2018
by Mahira Spiteri
Lingwa: MT
Document available also in: EN FR DE RO

Bħala Stat Membru tal-UE, l-Irlanda għandha aċċess għal programmi ta’ finanzjament tal-UE, bħal Erasmus+, li jappoġġjaw lin-nies biex jiksbu ħiliet tax-xogħol ġodda, jikkontribwixxu għal ċittadinanza attiva kif ukoll għall-iżvilupp personali. Dawn il-programmi jippermettu lill-AONTAS biex tappoġġja lill-membri tagħna biex jippromwovu u jagħtu profil lill-ħidma tat-tagħlim għall-adulti fl-Irlanda. Tipprovdi wkoll lill-membri bl-opportunità li jitgħallmu mill-ġirien tagħna tal-UE u biex jiksbu ideat ġodda u jadottawhom fl-Irlanda.

Fi Frar 2018, Lindsey Liston, miċ-Ċentru tar-Riżorsi tal-Familja ta’ Southill Limerick, vjaġġat lejn Malta biex tiltaqa’ ma’ persuni li jfasslu l-politika ewlenin u li huma involuti fit-tfassil tal-iskema tal-kura tat-tfal bla ħlas fi ħdan il-Ministeru għall-Edukazzjoni u x-Xogħol f’Malta. Il-vjaġġ sar bħala parti minn proġett ERASMUS+ organizzat minn AONTAS biex jappoġġja l-iżvilupp professjonali ta’ prattikanti fl-edukazzjoni għall-adulti.

Lindsey Liston, Southill FRC

Lindsey Liston minn Southill Limerick, taħdem maċ-Ċentru tar-Riżorsi tal-Familja (FRC, Family Resource Centre) u ilha involuta ma’ gruppi edukattivi fil-komunità, fil-belt ta’ Limerick, għal dawn l-aħħar 10 snin. Fi Frar 2018, Lindsey ħadet sehem fil-proġett ERASMUS+ "Nagħmlu Impatt f’livell Ewropew", proġett iffinanzjat mill-UE, organizzat minn AONTAS, li jappoġġja l-iżvilupp professjonali ta’ ħaddiema fl-edukazzjoni għall-adulti.

Bħala parti minn dan il-proġett, Lindsey vjaġġat lejn il-Ministeru għall-Edukazzjoni u x-Xogħol f’Malta biex tiltaqa’ ma’ persuni li jfasslu l-politika ewlenin u li huma involuti fit-tfassil tal-iskema tal-kura tat-tfal bla ħlas, bil-għan li tgħin u tkun ta’ appoġġ għax-xogħol ta’ Southill FRC.

L-iskop taż-żjara kien li jkun hemm skambju tal-għarfien u t-tagħlim, b’mod partikolari fl-oqsma tal-litteriżmu u interventi numeriċi, l-involviment tal-ġenituri fl-edukazzjoni, waqfien mill-iskola qabel iż-żmien u skema ta’ kura tat-tfal bla ħlas introdotta mill-Gvern Malti fl-2014.

Niftħu l-Bibien permezz tal-Litteriżmu

Fl-ewwel jum kont entużjasta biex niltaqa’ ma’ Christianne Fenech u l-kollegi tagħha fil-Ministeru tal-Edukazzjoni u x-Xogħol. Fil-ftit jiem qosra taż-żjara, kelli ppreparata għalija aġenda mimlija ġmielha li introduċitni għal aspetti varji tas-sistema edukattiva ta’ Malta għal tul il-ħajja kollha.

Fl-Aġenzija Nazzjonali tal-Litteriżmu, iltqajt ma’ għadd ta’ persunal anzjan. Tgħallimt dwar l-interventi kreattivi u innovattivi kollha għall-appoġġ u t-tisħiħ tal-litteriżmu u l-ħiliet numeriċi permezz ta’ taħriġ, appoġġ u programmi li qed jitmexxew f’kuntest ta’ snin bikrija, skejjel u komunitajiet usa’.

Innutajt li jingħataw premjijiet u rikonoxximenti lil tfal li jkunu qed jaqraw f’xi ġnien jew għall-apert fit-toroq eċċ. L-aġenzija tippubblika bookmarks biex tippromwovi l-qari "kull ħin, kullimkien". Huma jorganizzaw ukoll diversi avvenimenti u għandhom firxa impressjonanti ta’ programmi u inizjattivi li qed jiġu żviluppati u mogħtija, minn programmi ta’ qari fis-sajf, għal attivitajiet ta’ kitba għall-familja, li wħud minnhom ukoll jistgħu jintużaw mill-Irlanda biex tkun tista’ tibni u tespandi fuq il-firxa impressjonanti ta’ inizjattivi ta’ litteriżmu li għandha l-Irlanda stess.

Kura tat-Tfal Bla Ħlas - “Biex ix-Xogħol Ikun Irendi”

Minn perspettiva Irlandiża, forsi waħda mill-inizjattivi l-iktar interessanti li ġiet esposta għalihom matul l-iskambju kienet l-iskema ta’ kura tat-tfal bla ħlas, li kienet introdotta mill-Gvern Malti fl-2014. L-elementi bażiċi tal-iskema huma li l-ġenituri kollha li huma f’impjieg jew li qed isegwu kors ta’ edukazzjoni, jirċievu kura tat-tfal imħallsa mill-Istat li tippermettilhom ikomplu bil-ħajja tagħhom sew fl-impjieg kif ukoll fl-edukazzjoni tagħhom.

L-iskema rnexxiet u kienet ta’ suċċess kbir tant li r-rati tal-impjieg f’Malta rritornaw għal livelli massimi. Iż-żieda fid-dħul mit-taxxi minħabba rati ogħla ta’ nies f’impjieg u t-tnaqqis ta’ dipendenza fuq il-benefiċċji soċjali waslu biex l-iskema tiffinanza b’mod effettiv lilha nfisha. L-iżvantaġġ tal-iskema huwa li qed tkun miċħuda opportunità b’mod involontarju lil tfal li jista’ jkun li jinħtieġ li jingħataw attenzjoni fi stadju bikri, iżda minħabba li fil-preżent il-ġenituri tagħhom jistgħu jkunu qiegħda u/jew mhumiex f’pożizzjoni li jsegwu kors ta’ edukazzjoni, mhumiex qed jibbenefikaw minn din l-iskema.

Dan huwa fejn Malta u l-Irlanda jistgħu jitgħallmu minn xulxin. Fl-Irlanda, sibna mezz kif inkunu ta’ appoġġ għal dawk it-tfal li l-aktar jeħtieġu servizzi permezz ta’ provvedimenti ssussidjati, iżda forsi kien traskurat il-fatt li “x-xogħol għandu jkun irendi” kif ukoll ma ngħatax appoġġ effettiv għall-kura ta’ tfal ta’ ġenituri li jaħdmu. Iż-żewġ approċċi miż-żewġ pajjiżi kkunsidrati flimkien, għandhom il-potenzjal li jindirizzaw id-dgħjufija fiż-żewġ sistemi, filwaqt li jipprovdu kura tat-tfal effettiva, bi prezz baxx u ta’ kwalità għolja għal kulħadd, iżda l-esplorazzjoni ta' dan f’aktar dettall tista' tiġi deskritta fi blog ieħor!

Tagħlim b’riżultat tal-Vjaġġ

B’mod ġenerali, il-vjaġġ kien tassew produttiv u esperjenza utli ta’ tagħlim. It-tagħlim li ksibt minn din l-esperjenza se jtejjeb kif ukoll ikun ta’ gwida għax-xogħol attwali tiegħi kif ukoll għal dak futur f'Southill FRC. Huwa fetaħ ukoll il-bibien għal kollaborazzjoni transkonfinali futura bejn iż-żewġ pajjiżi tagħna, iżda forsi l-akbar vantaġġ tal-parteċipazzjoni fil-programm ERASMUS+ kien l-opportunità biex ikun identifikat u biex inkunu mfakkra f’dak li qed neċċellaw fih kif ukoll kif nistgħu ntejbu is-servizz fil-pajjiż tagħna stess.

Fl-Irlanda, bħal fil-biċċa l-kbira tal-pajjiżi Ewropej, għandna t-tendenza li niffukaw u nintilfu fuq l-affarijiet li mhux qed nagħmlu tajjeb jew fuq l-oqsma li mhux sejrin daqstant tajjeb u ma nkunux qed naraw dak li qed nagħmlu tajjeb. Dan il-vjaġġ ipprovda opportunità f’waqtha biex niġu mfakkra dwar dan u biex jiġu diskussi s-suċċessi tagħna, il-kisbiet tagħna u l-avvanzi tagħna, b’mod partikolari fil-qasam tal-ħiliet numeriċi u l-litteriżmu, l-involviment tal-ġenituri fl-edukazzjoni, l-intervent bikri u l-prevenzjoni u l-inugwaljanza.

 

Share on Facebook Share on Twitter Epale SoundCloud Share on LinkedIn